曾經俾投資銀行睇好嘅美高梅中國，業績經過疫後一輪急升，今年第一季度已經出現回軟。
重點：
- 首季收入同比下跌超過3%
- 貴賓廳業績跌幅達五成
劉智恒
澳門賭收經過疫後兩年一路狂奔之後，已經開始放緩落嚟。受到大環境嘅影響，舊年被證券界睇好嘅美高梅中國控股有限公司（2282.HK）都難以獨善其身，今年第一季度業績按年出現下滑。
集團嘅首季總收入接近80億港元（下同），按年下跌3.2%，經調整EBITDA（息、稅折舊及攤銷前盈利）為23.68億元，同比下跌5.5%。集團解釋，主要由於主場地賭枱投注額同比減少，導致娛樂場收益下跌所致。
美高梅中國喺澳門有兩個賭場，位於澳門半島嘅澳門美高梅，主場賭枱投注額按年跌7.4%至133.7億元；位於路氹嘅美獅美高梅，主場地投注額為148.5億元，同比下跌近4%。
貴賓廳業務挫五成
更令人驚訝嘅係貴賓廳賭枱轉碼數出現頗大跌幅，澳門美高梅由2024年第一季度嘅121.5億元，下挫近49%至62.37億元。美獅美高梅則由舊年第一季度嘅530億元，急跌至262.7億元，跌幅高達50%。
美高梅中國冇解釋貴賓廳收入勁跌嘅原因，但係早前公佈首季業績嘅金沙（1928.HK），貴賓廳嘅收入跌幅相對輕微，按年只跌一成多。因此相信美高梅中國貴賓廳業務部分被競爭對手搶走，部分係因為中國內地經濟疲弱，大客戶數量減少，以及佢哋嘅博彩注碼下跌所致。
酒店業務表現都倒退
除咗博彩之外，酒店嘅業務表現都出現倒退。首季入住率雖然能與舊年同期持平，平均達93%以上水平，但係每間可供入住客房收益（REVPAR）就出現較大跌幅，美獅美高梅由舊年第一季度嘅2,631元，跌21%至2,066元；澳門美高梅跌幅更大，由舊年第一季度嘅3,061元，跌23%至2,346元。
澳門月賭收唔夠200億
美高梅中國除咗自身貴賓廳業務大幅下滑之外，最大挑戰係澳門賭收已有見頂跡象。主要原因喺新嘅博彩法例下，賭場嘅運營模式改變，賭廳唔可以再外包，中介人只能收取佣金卻唔可以攤分盈利，令賭廳中介人嘅積極性大大減低；加上依家內地禁止賭場北上拉客，亦影響澳門博彩收入。相信澳門嘅賭收要重回高峰時全年3,000億元嘅水平，可能性微乎其微。
澳門博監局公佈上個月澳門賭收，博彩毛收入按年只微升1.7%至188.6億澳門元，但係按月下跌4.1%，而且已經係連續兩個月嘅下跌，博彩收入疲態畢現。
澳門政府舊年底估計2025年賭收達2,400億澳門元，按年增長11%。按此推算，當地每月平均賭收要有200億元先可以達全年目標；但係今年首四個月，每個月嘅賭收均低於此數，似乎今年賭收未必可以達標。喺整體博彩業收益已經達到或接近天花板嘅環境下，美高梅業務要進一步增長，毫無疑問受到限制。
貿易戰下冇贏家
貿易戰亦令澳門博彩業蒙上陰霾。雖然澳門以博彩為主，經濟收益八成嚟自賭收，美國嘅貿易占比微不足道，然而貿易戰影響全球經濟，當海外及中國內地經濟走下坡時，人們嘅旅遊與消費自然大打折扣，澳門嘅遊客量好大機會減少，手緊下博彩意欲亦會下跌。
早前澳門特首岑浩輝喺施政報告發表時都公開表示，中美貿易戰升級對澳構成嘅直接影響較細，但係承認會間接影響當地嘅旅遊及博彩業。
美國大加關稅後，短期未必見到影響，相信半年或一年後，各地政府公佈嘅經濟數據或下滑，上市企業嘅收益會受壓，業績下跌或調整無可避免，影響將陸續浮現。
六大博企重續賭牌時，美高梅中國因為所獲賭枱分配大增36%至750張，一度成為最大贏家，證券界紛紛睇好前景。然而喺博彩大環境放緩、未來經濟充滿隱憂，加上美高梅中國喺貴賓廳業務嘅受壓，業績有突破唔容易，股價嘅上升空間已受到局限。
