英超第37輪全部踢完，淨返最後一輪。雖然冠軍一早已經揭曉，但係歐洲賽名額嘅競爭依然非常激烈，充滿懸念！
歐聯：6個名額
英超一向有「爭四大戰」呢個講法，因為得頭四名先可以攞到下個球季嘅歐聯資格。不過歐聯擴軍之後，歐洲賽積分頭兩名嘅聯賽可以額外攞多一個名額，而英超今個球季歐洲賽積分第一，所以，聯賽第5都可以踢歐聯。
另外，曼聯同埋熱刺已經會師歐霸盃決賽，同時佢哋靠排名肯定無緣歐洲賽，所以邊個攞冠軍，邊個就可以晉級歐聯。
所以，下個球季英超將會有6隊參加歐聯。
而家，冠軍利物浦同亞軍阿仙奴已經攞到歐聯資格，第三名紐卡素、第四名車路士、第五名維拉都係66分，第六名曼城、第七名諾定咸森林都係65分，呈現5爭3嘅局面！
最後一輪，車路士同森林直接交手，基本上邊個贏邊個就可以入歐聯。維拉作客挑戰踢完歐霸盃決賽嘅曼聯，紐卡素就對陣愛華頓。
曼城少踢一場，如果週中贏埋對般尼茅夫嘅比賽，就會有68分，將會升上第3，如果打和，就會有4隊66分，咁末輪對富咸，就算贏波都未必入到歐聯，仲要睇人面色。
歐霸盃：至少2席
由於英超頭5踢歐聯，所以理論上英超第6同埋足總盃冠軍將會攞到下個球季歐霸盃嘅入場券。
水晶宮爆冷擊敗曼城，攞到足總盃冠軍，同時已經肯定無緣英超頭10，所以單獨攞到歐霸盃名額。
至於英超第6，好似上面所講，紐卡素、車路士、維拉、曼城、森林都有可能，呢個都算係對無緣歐聯嘅一個「補償」啦。
另外，今個球季嘅歐協聯冠軍都會攞到下個球季嘅歐霸盃資格。車路士已經入咗歐協聯決賽，將會同貝迪斯爭冠軍，如果輸波，咁就乜都唔使講，淨係可以靠聯賽排名去爭踢歐洲賽。
複雜嘅係，如果車路士攞到歐協聯冠軍呢？我可以哋分幾種情況討論。
首先，車路士已經唔會跌出英超頭7。如果車路士攞到英超頭5，攞到歐聯資格，咁佢哋通過歐協聯冠軍攞到嘅歐霸盃資格唔會順延俾其他英超球隊，而係還返俾歐洲足協，由歐洲足協嚟按照球會嘅歐洲賽積分嚟分配。
如果車路士攞到英超第6，攞到歐霸盃資格，咁通過歐協聯冠軍攞到嘅歐霸盃資格將會還返俾歐洲足協。
如果車路士攞到英超第7，攞到歐協聯資格，咁佢哋將會參加歐霸盃，而呢個歐協聯資格將會還返俾歐洲足協。
歐協聯：聯賽盃冠軍
今個球季聯賽盃冠軍係紐卡素，但係如果佢哋最終排名前5，攞到歐聯資格，咁歐協聯資格就會順延俾英超第7。
如果紐卡素最終排名第6，攞到歐霸盃資格，咁歐協聯資格就會順延俾英超第7；如果紐卡素最終排名第7，咁就直接參加歐協聯。而喺理論上，紐卡素已經唔會跌出英超頭7。
咁如果聯賽盃冠軍紐卡素攞到第6，歐協聯冠軍車路士攞到第7呢？咁兩隊都會參加歐霸盃，再加上足總盃水晶宮，咁就係3隊，同時歐協聯資格還返俾歐洲足協。
