有「東方蒙地卡羅」之稱嘅澳門，博彩稅收係澳門主要收入來源。但係，隨住中美貿易戰出現惡化趨勢，有顧問公司同葡文媒體憂慮，當地嘅美資博彩企業可能會受影響，甚至可能俾人針對。對此，行政長官岑浩輝表明，博彩企業以至其他外資，只要依法有序發展，都會得到政府嘅保護同支持。不過，呢番保證都未能刺激三間美資博企股價向上。
北京主管港澳事務嘅夏寶龍主任，喺星期二（13號）下午結束六日嘅澳門考察調研行程。澳門特首岑浩輝隨即召開記者會作出總結。當被問及中美貿易戰對在澳美資博彩企業嘅影響時，岑主動提出，留意到葡文媒體報導中美博弈嗰陣，特別關注高關稅同美國打壓中國企業，以及澳門政府會唔會針對在澳美資企業實施報復性嘅措施。佢就此表態：「我喺呢度作為行政長官表個態：我哋六大博企，有法律規定，只要按照法律規定，健康、依法、有序發展，唔單單係博企，所有外資企業喺澳門嘅經營同發展，一定得到特區政府依法嘅保護同支持。」
澳門而家發出六個博彩牌照，一半由美資持有，分別係永利、金沙同美高梅。喺岑浩輝作出保證後，三間博企喺香港股市只有窄幅上落，而且呈現輕微向下嘅趨勢。兩日嚟，三間公司嘅股價下調0.25%至1.42%之間。相反，澳博控股、銀河娛樂同新濠國際三間非美資博企嘅股價，喺過去兩日都有輕微上升。
博彩稅佔澳門收入升至80% 經濟多元化不成
喺過去一個月至夏寶龍訪問澳門期間，所有博彩企業嘅股價都有由低位回升嘅現象。但係，美資博企嘅升勢未能喺夏寶龍離開後維持。不過，大行麥格理喺13號發表嘅研究報告顯示，濠賭股表現仍然會係跟隨博彩收入數據波動。
夏寶龍訪澳期間雖然冇公開談及賭業，只係重申呼籲香港同澳門兩地商人營商不忘愛國。但係，澳門高度倚賴博彩業，以致經濟多元化發展未如北京意願更惹人關注。因為博彩業稅收嘅佔比唔跌反升，岑浩輝更明言，未來幾年，改變澳門財政結構對博彩業嘅依賴好困難。
根據當地財政局3月公佈嘅數字，去年博彩業收入大增至2267億澳門元(下同，折算約 251.7億歐元)，稅收達881億，佔澳門政府預算收入近80%，佔比較前年高3個百分點。呢個結果同政府喺《澳門特別行政區經濟適度多元發展規劃（2024-2028年）》中，將博彩業佔本地生產總值40%嘅目標相去甚遠，亦都意味澳門政府聲稱要促進經濟多元化並未成功。
不過，岑浩輝繼續強調，經濟多元化有其迫切性，呼籲各界團結一致，減少對博彩業嘅依賴，開拓新嘅增長道路。
佢同時承認，中美貿易摩擦對澳門經濟嘅影響，已經由間接變為直接影響。因為當地高度倚賴嘅中國內地遊客，佢哋嘅消費模式同類型已經顯著改變，例如消費較少同追求與以往唔同嘅體驗等等。佢透露連夏寶龍都明白「特種兵」旅遊呢種趨勢，所以政府必須調整策略，包括海外推廣澳門措施亦會側重喺葡語國家、西班牙同東南亞等市場。
